Sharait E Nabuwat

Unit 3

Lesson 14

شرائط نبوت 

سلاطین عالم کا یہ طریق رہا ہے کہ ہرکس و ناکس کو اپنا وزیر اور سفیر نہیں بناتے

وزارت اور سفارت کے لیے ایسے شخص کو منتخب کرتے ہیں جو عقل اور فہم میں یگانہ روزگار ہو

بادشاہ اور اس کی حکومت کا وفادار اور اطاعت شعار ہو صادق اور راست باز ہو امانتدار اور دیانتدار ہو    جھوٹا اور مکار نہ ہو زیرک اور دانا ہو کہ احکام شاہی کو سمجھنے میں غلطی نہ کرتا ہوغیرہ وغیرہ جب تک اس قسم کے اوصاف فاضلہ اور صفات کاملہ نہ ہوں گی اس وقت تک اس کو منصب وزارت و سفارت پر فائز نہیں کیا جاۓ گا۔جب شاہان دنیا کی مجازی اور فانی حکومت کی وزارت اور سفارت کے لیے یہ شرائط ہیں تو اس احکم الحاکمین اور شہنشاہ حقیقی کی نبوت اور خلافت کے لیے اس سے ہزار ہا درجہ بڑھ کر شرائط ہوں گی

حافظ تور پشتیؒ المعتمد فی المعتقد میں فرماتے ہیں

انبیاء کرام علیہ السلام ہمیشہ فرمان الہی کی پیروی کرتے ہیں اور ان کا نفس اطاعت خداوندی میں ہمیشہ ان کا تابع اور مطیع ہوتا ہے یہی وجہ ہے کہ یہ بزرگ حضرات خدا تعالیٰ کی معصیت سے معصوم ہوتے ہیں

اگر انبیاءکرام معصوم نہ ہوتے تو اللّه تعالیٰ مخلوق کو ان کی بے چوں و چرا اطاعت و متابعت کا حکم نہ دیتا۔انبیاء کی عقل دوسرے لوگوں کی عقل سے ارفع اور کامل ہوتی ہے

ان کے ادراکات دوسروں کے ادراکات سے بہت سریع اور تیز ہوتے ہیں

خطا اور غلطی سے محفوظ و مامون ہوتے ہیں ان کی راۓ دوسروں کی راۓ سے زیادہ تیز اور قوی ہوتی ہے۔یہی وجہ ہے کہ علوم وحی کو جس طرح انبیاءکرام سمجھتے ہیں دوسروں سے ممکن نہیں

ان کا حافظہ سب سے قوی ہوتا ہے اور فصاحت و بلاغت اور تاثیر سخن میں بھی انبیاءکرام تمام ابناء عصر پر غالب رہتے ہیں ان کی ظاہری اور باطنی قویٰ سب سے زیادہ قوی ہوتی ہے

ان کا خلق نہایت نیک اور ان کی صورت بڑی وجیہہ اور ان کی آواز نہایت عمدہ اور غایت درجہ مؤثر ہوتی ہے

غرض یہ کہ انبیاءکرام جس طرح سیرت اور معنی کے لحاظ سے سب سے بڑھ کر ہوتے ہیں اسی طرح صورت اور ظاہر میں خوب تر اور پسندیدہ تر ہوتے ہیں

(مترجما من الفارسیة بالہندیة)

اس زمانہ میں لوگوں نے نبوت و خلافت کو کھیل بنا لیا ہے جس کا جی چاہتا ہے نبوت کا دعویٰ کر دیتا ہے۔وحی اور الہام کے اشتہار شائع کرنے شروع کر دیتا ہے    اس لیے ہم مختصر طور پر نبوت کی کچھ شرائط ذکر کرتے ہیں جو عین عقل سلیم کے مطابق ہیں اور ان شاء اللّه کسی عقل والے کو ان کو قبول کرنے میں تردد نہ ہو گا اور جو لوگ مرزا غلام احمد قادیانی کے دام میں پھنسے ہوۓ ہیں ان شاء اللّه  ان پر مرزا قادیانی کی نبوت کی حقیقت خوب واضح ہو جاۓ گی