Hadees ki kitabon ka Ta'aruf

حدیث کی کتابوں کا تعارف

حدیث کی کتابیں وضع, ترتیب مضامین اور مسائل کے اعتبار سے چند قسم پر ہیں

جامع

وہ کتاب هے جس میں درج ذیل آٹھ مضامین کی احادیث مبارکہ مجتمع ہوں

مثلاً جامع البخاری, جامع الترمذی

سیر آداب تفسیر و عقائد فتن احکام اشراط و مناقب

فائدہ

صحیح مسلم کا شمار جامع نہیں کیونکہ اس میں کتاب التفسیر قلیل نہ ہونے کے برابر ہے. اگرچہ بعض نے اس کا اعتبار کرتے ہوئے صحیح مسلم کو جامع کی فہرست میں شامل کیا ہے

والحق ما ذکرانعامات المنعم لطالبات المسلم

سنن

وہ کتاب ہے جس میں احکام کی احادیث ابواب فقہیہ

کتاب الطھارۃ - الصلوۃ - الزکوۃ - الحج -النکاح-البیوع

وغیرہ کی ترتیب کے مطابق بیان ہوں مثلاً سنن ابی داؤد,سنن ابن ماجہ، سنن نسائی, جامع وسنن ترمذی 

مسند

وہ کتاب ہے جس میں صحابہ کی ترتیب شرافت اسلامی یا ترتیب حروف یا ترتیب تقدم وتأخر اسلامی کے لحاظ سے احادیث مذکور ہوں مثلاً مسند احمد و مسند دارمی

معجم 

وہ کتاب ہے جس کے اندر احادیث جمع کرنے میں مصنف اپنے اساتذہ کی ترتیب کا لحاظ رکھے مثلاً معجم طبرانی

جز

وہ کتاب ہے جس میں صرف ایک ہی مسئلے کی احادیث یکجا ہوں

 مثلاً جزءالقرأۃ للبیھقی

مفرد

وہ کتاب ہے جس میں صرف ایک ہی محدث کی کل مرویات مذکور ہوں مثلا ابو ھریرۃ یا انس یا خذیفہ رضی اللّه عنھم 

غریب 

وہ کتاب ہے جس میں ایک محدث کے شیخ کے تفردات جمع کئے گئے ہوں مثلاً الافراد للدار قطنی

مستخرج

وہ کتاب ہے جس میں کتابوں کی حدیثوں کی ان زائد سندوں کا استخراج کیا گیا ہو جو مصنف کی ذاتی ہوں حتی کہ وہ مصنف اس دوسری کتاب کے مصنف کے ساتھ جا کر اوپر سند میں شریک ہو جائے مثلا مستخرج ابو عوانۃ علیٰ صحیح مسلم

 اس کا فائدہ یہ ہے کہ دوسری کتاب کی روایت پر مزید وثوق اور اعتماد حاصل ہو جاتا ہے

مستدرک

وہ کتاب ہے جس میں دوسری کتاب کی شروط کے موافق اسکی رہی ہوئی احادیث کو پورا کر دیا گیا ہو مثلاً مستدرک حاکم علی الصحیحین

رسالہ 

وہ مجموعہ ہے جس میں خاص کسی ایک مقصد کی احادیث جمع کی جائیں مثلاً الادب المفرد للبخاری

اربعین

وہ مجموعہ ہے جس میں صرف چالیس احادیث اس لئے جمع کی جائیں کہ درج ذیل حدیث کی فضیلت و سعادت حاصل ہو جائے

 من حفظ علی امّتِی اَربعین حدیثاً فی امر دینھا, بعثہ اللّٰه فقیھا, و کنت لہ یوم القیامۃ شافعا و شھیدا

(رواہ البہیقی فی شعب الایمان وکنز)

جس نے چالیس حدیثیں امور دینیہ میں سے یاد کیں 

الله اس کو قیامت کے دن فقیہ اٹھائے گا اور میں اس کے لئیے شفیع اور گواہ ہوں گا