Qurani Qirat ke mutaliq sawalat

قرآنی قرأت کے متعلق چند سوالات

سوال

اختلاف قرأت سے متعلق مندرجہ ذیل مسائل کے بارے میں علما کیا فرماتے ہیں ؟

 لہجوں کا اختلاف تو اپنی جگہ ایک حقیقت ہے لیکن

بعض مقامات پر الفاظ اور معانی بھی بدل جاتے ہیں جیسے: سورة یوسف میں’’ یرتع ویلعب‘‘ کی ایک قرأت ’’وترتع وتلعب‘‘ ہے


 بقول ابن کثیررحمة اللّٰہ اسی طرح  سورة یوسف آیت ۱۱۰ میں ہے

’’وظنوا انھم قد کذبوا ‘‘

اسے حضرت عائشہؓ شد کے ساتھ پڑھنے کو سختی سے کہا کرتیں تھیں۔

 کیا یہ قرأتیں حضور ﷺ سے ثابت ہیں؟

اور ایک قرأت کو دوسری پر ترجیح کی کیا وجہ ہے؟

مذاہب اربعہ میں سب قرأتیں ہیں یا وہاں بھی کسی ایک کو دوسری پرترجیح ہے ؟

جواب

 بہت سی صحیح احادیث سے واضح ہوتا ہے کہ قرآن کریم ’’سات حروف‘‘ پر اتارا گیا ہے، اس سے مراد وہ قرأتیں ہیں جو تواتر کے ساتھ منقول چلی آرہی ہیں، البتہ  تفصیل میں علما کی دو رائیں ہیں، بعض اہل علم کی تحقیق کے مطابق یہ قرأتیں ہجرت سے قبل مکہ مکرمہ میں نازل ہوئی ہیں، جبکہ دیگر علما کا کہنا ہے کہ مدینہ منورہ میں نازل ہوئی ہیں، دونوں اقوال میں تطبیق کی صورت یوں بتائی گئی ہےکہ قرأتوں کے نزول کا آغاز تو قرآن کریم کے ساتھ ساتھ مکہ مکرمہ میں ہی ہوچکا تھا، لیکن مکہ میں زبان کے ایک ہونے کی بنا پر  انکے استعمال کی ضرورت پیش نہیں آئی، مدینہ میں جب لہجوں اور زبانوں کے بولنے والے قبائل اسلام میں داخل ہونے لگے تو ان کا استعمال بھی ہونے لگا،  معلوم ہوا کہ ان قرأتوں کا ثبوت رسول ﷺ سے ہے۔ یہاں یہ پہلو بھی واضح رہے کہ متواتر قرأتوں کی قبولیت کے لیے یہ شرط ہے کہ عربی زبان میں اس کی قوی وجہ ہو، رسم عثمانی کےموفق ہو اور تواتر کے ساتھ منقول ہو۔ یہی ’’ قرأت سبعہ متواترہ‘‘  کہلاتی ہیں، اور جن قرأتوں میں ان تینوں میں سے کوئی ایک شرط نہ پائی جائے وہ ’’شاذ ‘‘کہلاتی ہیں۔ امام ابن جزریؒ نے ان قرأت کے فوائد اور حکمتوں پر تفصیلی کلام کیا ہے۔

  مذکورہ تفصیل سے ثابت ہوا کہ قرأت کی دو قسمیں ہیں، اب  ان میں سے متواترکی شاذ پر ترجیح  واضح ہے، مزید براں علما نے ’’علم الاحتجاج‘‘ کے نام سے ایک مستقل علم کی بنیاد ڈالی ہے، جس میں لغت وعربیت کے پہلو سےان قرأت کی علم و توجیہات  کی تحقیق کی جاتی ہے، اور ترجیح کے معیارات قائم کیے گئے ہیں، موضوع سے متعلقہ کتب میں اس کی تفصیل دیکھی جاسکتی ہے۔ 

امام ابوحنیفہ رحمة اللّٰہ ، امام عاصم کوفی رحمة اللّٰہ کی قرأت کو ترجیح دیتے ہیں، باقی ائمہ عموما روایت حفص کو ترجیح دیتے ہیں۔ 

واللّٰہ اعلم