Sahah E Sittah Kutb Ahadees

بیان کتب حدیث

کتب حدیث میں مختلف اعتباروں سے دو  مشہور تقسیمیں ہیں۔

پہلی تقسیم

 حدیث کی کتابیں وضع وترتیب  مسائل کے اعتبار سے نو قسم پر ہیں۔

١-جامع                    ٢-سُنن

٣-مُسَند                  ٤-مُعجم

٥- جُزء                  ٦:مُفرَد

٧-غَرِيب                 ٨-مُستَخرَج

٩-مُستدرَك

جامع

 وہ کتاب ہے جس میں تفسیر ،عقائد،آداب, احکام،مناقب،سِیَر،فِتن ،علامات قیامت وغیرہا ہر قسم  کے مسائل کی احادیث مندرج ہوں۔کما قیل 

سِیَر آداب و تفسیر و عقائد

فِتَن احکَامُ واَشراط و مناقب

جیسے: بخاری و ترمذی۔

سُنَن

وہ کتاب ہے جس میں احکام کی احادیث فقہی ابواب کی ترتیب کے موافق بیان ہوں۔جیسے سنن ابوداؤد،سنن نسائ،سنن ابن ماجہ۔

مُسْنَد

 وہ کتاب ہے جس میں صحابہ کرام رضوان اللّٰه علیہم اجمعین کی ترتیب رُتبی یا ترتیب حروف ہجاء یاتقدّم و تاخِّر اسلامی
کے لحاظ سے احادیث مذکور ہوں جیسے: مسنداَحمد،مُسندِ دارمی۔

مُعْجَم

وہ کتاب ہے جس کے اندر وضع احادیث میں ترتیب اساتذہ کا لحاظ رکھا گیا ہو۔جیسے:معجم طبرانی۔

جُزء

وہ کتاب ہے جس میں صرف ایک مسئلہ کی احادیث یکجا جمع ہوں 

جیسے: جُزْءُ الْقِراءَۃ وَ جُزءَ رَفْعُ الْیَدَیْنِ لِلْبُخَاریؒ وَجُزءُالْقِراءَۃِ لِلْبَیْھَقِیؒ

مفرد 

وہ کتاب ہے جس میں صرف ایک شخص کی کل مرویات ذکر ہوں۔

غریب

وہ کتاب ہے جس میں ایک محدث کے متفردات جو کسی شیخ سے ہیں وہ ذکر ہوں

 (عجالۂ نافعہ:ص ١٤ عرف الشذّي)

مُستَخرج 

وہ کتاب ہے جس میں دوسری کتابوں کی حدیثوں کی زائد سندوں کا استخراج کیا گیا ہو۔  جیسے مُستَخرج اَبو عَوانہ۔

مستدرک

وہ کتاب ہے جس میں دوسری کتاب کی شرط کے موافق اس کی رہی ہوئ حدیثوں کو پورا کر دیا گیا ہو۔جیسے: مستدرک حاکم۔

(الحطه فی ذکر الصِحاحِ الستّه)

        دوسری تقسیم    

کتب حدیث مقبول و غیر مقبول ہونے کے اعتبار سے  پانچ قسم پر ہیں۔

پہلی قسم

وہ کتابیں جن میں سب  حدیثیں صحیح ہیں جیسے مؤطا امام مالک،صحیح بخاری،صحیح مسلم،صحیح ابن حبان،صحیح حاکم،مختارہ ضیاء مقدسی، صحیح ابن خزیمۃ،صحیح ابن عوانہ،صحیح ابن سکن،  متْقىٰ ابن جارود۔

دوسری قسم

وہ کتابیں ہیں جن میں احادیث،صحیح و حسن ضعیف ہر طرح کی ہیں مگر سب قابل احتجاج ہیں،کیونکہ ان میں جو حدیثیں ضعیف ہیں وہ بھی مرتبہ میں حَسن کے قریب ہیں ،جیسے  سنن ابو داؤد،جامع ترمذی،سنن نسائی،مسند احمد۔

تیسری تقسیم 

وہ کتابیں ہیں جن میں  حَسَن،صَالح،مُنکر،ہر نوع کی حدیثیں ہیں،جیسے

١- سنن ابن ماجه

        ٢- مسند طيالسى    

   ٣- زيادات ابن احمد بن حنبل

      ٤- مسند عبدالرزاق

٥- مسند سعيد بن منصور 

٦- مصنف ابی بکر بن ابی شیبہ

٧- مسند ابو يعلىٰ موصلى

٨- مسند بزّار 

      ٩- مسند ابن جرير    

      ١٠- تہزيب ابن جرير

 ١١- تفسیر ابن جریر 

  ١٢- تاريخ ابن مَردُوَيه

     ١٣- تفسير ابن مَردُويه  

     ١٤-طبراني كى معجم كبير

        ١٥- معجم صغير

          ١٦-معجم اوسط

        ١٧-سنن دارِ قُطني

         ١٨- غرائب دارِ قُطني  

         ١٩- حليه ابى نعيم

       ٢٠- سنن بيهقى

             ٢١- شعب الايمان بيهقى

چوتھی قسم 

وہ کتابیں ہیں جن میں سب حدیثیں ضعیف ہیں۔ اِلاّ مَا شَاءَ اللّٰه جیسے: نوادرُالاصول حکیم ترمذی،تاریخ الخلفاء، تاریخ ابن نجار، مسند الفردوس دیلمی، کتاب الضعفاء عقیلی، کامل ابن عدی، تاریخ خطیب بغدادی،تاریخ ابن عساکر۔

پانچویں قسم 

 وہ کتابیں ہیں جن سے موضوع حدیثیں معلوم ہوتی ہیں۔جیسے: موضوعات ابن جوزی،موضوعات شیخ محمد طاہر نہروانی وغیرہ۔رسالہ فِی مَا یَجِبُ حِفْظُهٗ للنَّاظِر،

مؤلفہ حضرت شاہ ولی اللّٰه محدث دہلوی

    بیانِ صِحا ح سِتّہ   

صحاح ستہ سے مراد  حدیث کی یہ چھ کتابیں ہیں ۔صحیح بخاری،صحیح مسلم، جامع ترمذی، سنن نسائ، سنن ابو داؤد، سنن ابن ماجہ 

اور بعض محدثین نے ابن ماجہ کی بجائے مؤطا امام مالک اور بعض نے مسند دارمی کو شمار کیا ہے اور ان چھ کتابوں کو  صحاح کہنا تغلیباً ہے ،کیونکہ صحیح تو صرف بخاری و مسلم ہی ہیں۔  

 (کذافی مقدمتہ المشکوٰۃ،عجالۂ نافعہ)

   مَراتبِ صِحاح سِتّہ  

پہلا مرتبہ بخاری کا ہے، دوسرا مسلم کا،تیسرا ابو داؤد کا ،چوتھا نسائی کا،پانچواں ترمذی کا ،چھٹا ابن ماجہ کا۔

   مَزَاہبِ صِحاح سِتّہ   

امام بخاریؒ مجتہد ہیں

(نافعہ کبیر کشف الحجاب) 

یا شافعی 

طبقات شافعیہ،ج :٢  الحطّه ص :١٢١

امام مسلمؒ شافعی ہیں

(الیانع الجنی ص:٤٩)

امام ابو داؤدؒ حنبلی ہیں

( الحطّہ ص:١٢٥)

یا شافعی

 (طبقات شافعیہ ج:٦ ص:٤٨)

امام نسائیؒ شافعی ہیں

(الحطّہ ص:١٢٧)

امام ترمذیؒ و ابن ماجہؒ بھی شافعی ہیں 

(عرف الشّذی)